Icyorezo cya Covid-19 gikomeje gushegesha imikino ku isi aho mu Bwongereza umukino wagombaga guhuza ikipe ya Newcastle na Aston Villa kuwa Gatanu w’iki cyumweru wasubitswe kubera umubare munini w’abakinnyi b’ikipe ya Newcastle banduye.

Sponsored Ad

Newcastle yandikiye abategura Premier League ibamenyesha ko bamwe mu bakinnyi ndetse n’abakozi bayo bishyize mu kato kubera ko basanganwe Covid-19 bituma uyu mukino wari utegerejwe na benshi usubikwa.

Icyakora,iyo Premier League yanga gusubika uyu mukino,abakinnyi ba Newcastle bari gukina byanze bikunze.

Ubusabe bwabo bwakiriwe nkuko byashyizwe hanze n’ubuyobozi mu itangazo ryashyizwe kuri Twitter riti “Umukino Newcastle yagombaga gusuramo Aston Villa kuri uyu wa Gatanu wasubitswe kubera umubare munini w’abanduye Covid-19 ku kibuga cy’imyitozo cya NUFC.

Amatariki mashya umukino wimuriweho azatangazwa mu minsi iri imbere.”

Amakuru aravuga ko abakinnyi 10 ba Newcastle banduye Covid-19 ndetse bakaba batari gukora imyitozo kuko bahise bajyanwa mu kato.

Amakuru aravuga kandi ko uyu mubare ushobora kwiyongera no mu bakozi barimo n’umutoza Steve Bruce.

Iyi kipe iri gukorana n’abashinzwe ubuzima mu Bwongereza kugira ngo bamenye uwakwirakwije iki cyorezo ndetse no kugabanya ingaruka cyateza.

Abakinnyi bose ba NUFC n’abatoza ndetse n’abakozi bazongera gupimwa muri iki cyumweru kugira ngo bamenye uko bahagaze ndetse ngo nta muntu n’umwe uzatangazwa izina.