Ikipe ya Kiyovu Sports yihoreye kuri Sunrise FC iyitsinda ibitego 4-0 ndetse iyiharurira inzira iyerekeza mu kiciro cya kabiri,mu mukino w’umunsi wa 26 wa shampiyona wabereye kuri Kigali Pele Stadium.

Sponsored Ad

Nyuma y’uko Sunrise FC ibujije igikombe cya Shampiyona Kiyovu Sports muri 2023, Kiyovu Sports yaje yakaniye ishaka kuyitsinda ngo iyiharurire inziza ijya mu kiciro cya kabiri.

Umuyobozi w’Abafana ba Kiyovu Sports, Minani Hemed, yari yatangarije RBA ko biteguye kwihorera kuri Sunrise FC, yabavukije igikombe bari bamaze imyaka 29 badatwara.

Ati "Uyu munsi ibibazo, Kiyovu Sports ifite twabitewe na Sunrise FC. Nyirabayazana ni Sunrise, igitego badutsinze tariki 21 Gicurasi 2023, kugeza uyu munsi ingaruka zacyo ziracyadukurikiranye kugeza uyu munsi."

Mbere y’uyu mukino,Kiyovu ibinyujije ku rubuga rwa X,yabaje Sunrise FC iti"Mwaramutse neza Sunrise FC.Ese muribuka tariki 21/05/2023?

Muze tubahembere imirimo myiza mwakoze. Ni mukanya 15h00 kigali pele stadium."

Igice cya mbere cy’uyu mukino cyarangiye Kiyovu Sports itsinze ibitego 3 ku busa. Ni ibitego byatsinzwe na Afred Leku watsinze bibiri ku munota wa 7 na 41 na Richard Kirongozi kuwa 38.

Mu gice cya kabiri,Kirongozi yashyizemo igitego cya kane ku munota wa 61,cyabaye icya kabiri cye muri uyu mukino.

Nyuma yo gutsinda uyu mukino,Kiyovu Sports yashinyaguriye Sunrise FC iti: "Indangamanota y’amasomo mwize umwaka ushize twizereko izabafasha mu minsi iri imbere."

Uko imikino yagenze:

KIYOVU SPORTS 4-0 SUNRISE FC

MUSANZE FC 2-1 GORILLA FC

Urutonde:

1. APR FC 59 Pts (-1)
2. RAYON SPORTS 48 (-1) Pts
3. Musanze FC 47 Pts
.
.
6. KIYOVU SPORTS 37 Pts
.
.
10. Gasogi United 29 Pts
.
.
13. Etincelles FC 26 Pts (-1)
14. Sunrise FC 26 Pts
15. Bugesera FC 24 Pts (-1)
16. Etoile De L’Est 22 Pts