Ikipe ya APR BBC yatsinzwe na Rivers Hoopers yo muri Nigeria amanota 86-82 mu mukino wayo wa kabiri muri BAL 2024, Sahara Conference iri gukinirwa i Dakar.

Sponsored Ad

Mu mukino wari ugoye cyane,APR BBC iri gukina n’amakipe akomeye bigaragara yatsinzwe mu gace ka nyuma n’iyi kipe yo muri Nigeria,biyiha umukoro ukomeye mu mikino isigaye.

APR BBC yatsinzwe agace ka mbere ku manota 19 kuri 18, gusa iza kugaruka neza mu ka kabiri igatsinda 22 kuri 21.Amakipe yombi yagiye kuruhuka anganya amanota 40-40.

Ntabwo APR BBC yorohewe n’uduce tubiri twa nyuma tw’umukino, kuko yadutsinzwe ku manota 82-86 y’iyi kipe yo muri Nigeria yatsindaga umukino wayo wa kabiri,nyuma yo gutsindira mu rugo AS Douanes.

Umukinnyi wazonze APR ni Will Perry washoje umukino atsinze amanota 31.Noah Obadiah wa APR niwe watsinze amanota menshi muri uyu mukino, 32.

Ubu APR BBC iri ku mwanya wa gatatu mu makipe ane kandi ifite umukoro ukomeye cyane wo gutsinda As Douanes iri iwayo muri Senegal ndetse ikomeye bigaragara.

Mu gihe APR BBC yatsinze US Monastir bigoranye kuko hitabajwe inyongera,iyi AS Douanes yayitsinze amanota 76-59.

Amakipe abiri niyo azabona itike yo kuza i Kigali mu mikino ya nyuma bityo APR BBC irasabwa kwigaranzura iyi kipe ya AS Douanes mu mukino wo kuri uyu wa kabiri.

Icyakora hazabaho kongera guhura n’aya makipe mu yindi mikino yo kwishyura muri iri tsinda.

Itsinda rya Sahara Conference niryo rya nyuma riri gukinwa muri iyi mikino ya BAL 2024 mbere y’uko amakipe umunani ya mbere, aza gukinira muri BK Arena kuva tariki ya 24 Gicurasi kugeza tariki ya 1 Kamena.