Perezida Félix Antoine Tshisekedi wa Repubulika Iharanira Demokarasi ya Congo, yategetse ko hakorwa ibishoboka byose kugira ngo abishe Chéburin Okende wahoze ari Minisitiri bafatwa bagahanwa.

Sponsored Ad

Kuri uyu wa Kane ni bwo Okende wahoze ari Minisitiri w’Ubwikorezi n’Itumanaho muri RDC yasanzwe mu modoka ye yiciwe i Kinshasa.

Uyu mugabo wabaye Minisitiri hagati ya 2021 na 2022 yishwe nyuma y’uko ejo ku wa Gatatu yari yashimuswe, ubwo yari yitabye urukiko mu rwego rwo gutanga ibisobanuro ku mitungo ye.

Perezida Tshisekedi mu butumwa bwe bwanyujijwe kuri Perezidansi ya RDC, yihanganishije umuryango w’uriya mugabo wari usanzwe ari Umuvugizi wungirije w’ishyaka Ensemble Pour la République rya Moïse Katumbi.

Tshisekedi yasabye ko abamwishe bahigwa bakaryozwa kumwica.

Iti: "Perezida Félix Tshisekedi muri iki gitondo yakiranwe umubabaro urupfu rubabaje rwa Bwana Chérubin Okende, wahoze ari Minisitiri w’Ubwikorezi n’Itumanaho. Umukuru w’Igihugu yihanganishije umuryango ndetse n’abantu ba hafi ya Honorable Okende.

Tshisekedi yasabye ubutabera "gushyira umucyo kuri iki kibazo mu rwego rwo guhana abakoze iki gikorwa gisuzuguritse."