Muri Sudani y’Epfo Coronavirus iravuza ubuhuha aho mu munsi umwe gusa yahitanye Abajenerali batatu aribo Gen David Manyot Barach, Gen Elijah Alier Ayom na Gen Mabior Maket.

Sponsored Ad

Inkuru y’urupfu rw’aba basirikare bakuru yemejwe n’Umuvugizi w’Igisirikare cya Sudani y’Epfo, Brig Gen Santo Domic Chol, wanavuze ko Umugaba Mukuru w’ingabo, Gen Johnson Juma Okot, yahamagariye abasirikare bose kubahiriza amabwiriza yo kwirinda COVID-19.

Igisirikare cya Sudani y’Epfo cyavuze ko umuhango wo gushyingura bariya basirikare uzakorwa n’itsinda rya bamwe mu basirikare bacyo bafatanyije n’abagize imiryango ya ba nyakwigendera.

Bariya bajenerali bapfuye mu gihe mu byumweru bibiri bishize abarimu babiri bakomeye bigishaga muri Kaminuza ya Juba na bo bahitanwe na COVID-19, bituma umubare w’abo imaze guhitana ugera ku bantu 95.

Mu kwezi gushize ho abantu 27 bakora mu biro by’umukuru w’igihugu, Salva Kiir, barimo n’abaganga be basanzwemo icyorezo cya COVID-19.

Muri rusange muri Sudani y’Epfo kugeza ubu haharurwa abantu 8,144 bamaze kwandura kiriya cyorezo.

Ishami ry’Umuryango w’Abibumbye ryita ku buzima (OMS), rivuga ko imibare y’abandura COVID-19 muri Sudani y’Epfo ikomeje kwiyongera kubera ko hari benshi batubahiriza amabwiriza yo kwirinda, nko kwambara agapfukamunwa no guhana intera.