Kompanyi ya Kenya yo gutwara abagenzi mu ndege, Kenya Airways, ivuga ko abakozi bayo bafunguwe ku wa mbere muri Repubulika ya Demokarasi ya Congo bari bafunzwe kubera "kumva ibintu nabi" kw’abategetsi.

Sponsored Ad

Iyi kompanyi ivuga ko igiye gusubukura ingendo zayo muri icyo gihugu – yari yarahagaritse – nyuma yuko abo bakozi bayo babiri bafunguwe "nta yandi mananiza".

Abo bakozi bari bafunzwe mu kwezi gushize bashinjwa kubura ibyangombwa byo kuri gasutamo birebana n’uwatangajwe ko ari umuzigo w’agaciro kenshi cyane.

Iyi kompanyi yakomeje gushimangira ko abo bakozi bayo ari inzirakarengane.

Umuyobozi w’iyo kompanyi, Allan Kilavuka, yabwiye ikiganiro Newsday cya BBC ko uwo muzigo uvugwa wari ugizwe n’amafaranga y’inoti za banki yo muri DR Congo zari zijyanwe muri Amerika.

Kilavuka yavuze ko iyi kompanyi y’indege itari yakiriye uwo muzigo icyo gihe abakozi babiri bayo batabwaga muri yombi.

Ariko yavuze ko abategetsi bo muri DR Congo bafatiriye ayo mafaranga ndetse bafunga abo bakozi.

Yagize ati: "Ibi byari ukumva ibintu nabi gusa kw’abasirikare bakuru bo mu butasi bwa gisirikare."

Yongeyeho ko iyi kompanyi yari yagerageje inshuro nyinshi gusobanura "ko tutari twakiriye ayo mafaranga ariko ntibabyumvaga".

Ati: "Rero uko jye mbifata gusa ni uko biboneka ko habayeho kutumva ibintu neza – wenda hagati y’abasirikare bakuru n’abakozi bo hejuru bo kuri gasutamo i Kinshasa."

Abategetsi bo muri DR Congo nta cyo bari batangaza kuri ibi.

Uko gukomeza gufunga abo bakozi kwari kwatumye Kenya Airways ihagarika ingendo zerekeza i Kinshasa, ivuga ko uko ibintu byari bimeze byatumaga bigorana kuri yo gukomeza izo ngendo.

Mu cyumweru gishize, iyi kompanyi yavuze ko yari irimo gukorana n’inzego z’iperereza n’izindi nzego za leta zo muri Congo na Kenya mu gucyemura icyo kibazo.

Ubu iyi kompanyi yashimye ibikorwa byose byakozwe kugira ngo abo bakozi bayo barekurwe, birimo n’ibyakozwe n’abategetsi bo muri leta n’ambasade ya Kenya i Kinshasa.

Kenya Airways ivuga ko ingendo zayo zerekeza i Kinshasa zitezwe gusubukurwa guhera kuri uyu wa gatatu, ubu "ubufasha bwa ngombwa bwaho [i Kinshasa] burahari".

Kilavuka yavuze ko na we azerekeza i Kinshasa kugira ngo ikibazo gicyemuke neza.

BBC