Indege itwaye icyiciro cya mbere cy’inkingo z’icyorezo cya COVID-19 ziri muri gahunda ya Covax, imaze kugera mu Rwanda.Ni inkingo ibihumbi 240 zo mu bwoko bwa AstraZeneca.

Sponsored Ad

Amakuru dukesha RBA avuga ko ku mugoroba haza izindi 102,960 zo mu bwoko bwa Pfizer.

Izi nkingo zikaba zakiriwe n’abayobozi banyuranye.

Indege yari itwaye icyiciro cya mbere cy’inkingo z’icyorezo cya COVID19 zo mu bwoko bwa AstraZeneca yageze i Kigali ahagana saa mbiri za mu gitondo kuri uyu wa 03 Werurwe 2021.

Minisiteri y’Ubuzima ivuga ko ku ikubitiro hazakingirwa abantu 171.480 barimo abakozi bo kwa muganga,abarengeje imyaka 65 y’amavuko,abasanganywe izindi ndwara n’abandi bari ku ruhembe rwo guhangana na Covid-19.

Muri iyi gahunda,Kenya yakiriye doze miliyoni 1.02 z’uru rukingo rwa AstraZeneca, na DR Congo yakira doze miliyoni 1.7 z’urwo rukingo.

Iyi minisiteri yatangaje ko izo doze zose zitaterwa abantu 171, 480, gukingira bitangira kuwa gatanu w’iki cyumweru.

Muri gahunda ya Covax, izi ni doze z’inkingo za AstraZeneca ibihugu byo mu karere bizakira, ku rutonde rw’agateganyo rwatangajwe na WHO/OMS mu kwezi gushize:

DR Congo: 6,948,000
Kenya: 4,176,000
Rwanda: 1,098,960 (AstraZeneca na Pfizer)
South Sudan: 864,000
Uganda: 3,552,000

U Rwanda rwatangaje ko rwamaze kurangiza imyiteguro yose mbere y’itangwa ry’inkingo, kuko rwanamaze kugura ibyuma bifite ubushobozi bwo kubika inkingo zikonje kuri degree Celcius -70, bikagira ubushobozi bwo kubika inkingo ibihumbi 300.

Muri rusange, u Rwanda ruzahabwa inkingo miliyoni 1 098 960 zishobora gukingira abaturage 549 480 kuko izi nkingo zombi zikenera guterwa kabiri kugira ngo zitange umusaruro.

Izo nkingo zirimo ibihumbi 996 zakozwe n’Uruganda rwa AstraZeneca ndetse n’izindi 102 960 zakozwe na Pfizer.

Mu minsi ishize kandi u Rwanda rwari rwatanze inkingo 1 000 zahawe abarimo abakora mu nzego z’ubuzima ndetse n’abakinnyi b’Ikipe y’Igihugu, Amavubi, ariko izo nkingo ntabwo zari muri gahunda ya Covax.

Minisitiri w’ubuzima yatangaje ko u Rwanda rufite intego yo "gukingira 30% by’abaturage b’u Rwanda kugera mu mpera za 2021, na 60% kugera ku mpera za 2022".

Covax ni gahunda ishyigikiwe na UN/ONU yahurije hamwe ibihugu bikagura inkingo ku nganda zazikoze hagamijwe cyane cyane kuzigeza ku bihugu bidafite amikoro yo kuzigurira ku isoko.

Iyi gahunda iteganya gutanga doze miliyari ebyiri ku bihugu 190 mu gihe kitarenze umwaka.