Ikipe ya Manchester City yatsinze West Ham United ibitego 3-1, yegukana Igikombe cya Shampiyona y’u Bwongereza (Premier League) ku nshuro ya kane yikurikiranya, ikaba iya cyenda muri rusange.

Sponsored Ad

Mu gihe City yari ikeneye intsinzi kugirango yizere neza gutwara igikombe Arsenal bari bahanganye, yatangiye neza umukino itsinda ibitego hakiri kare.

Phil Foden yafunguye amazamu kuri iyi kipe ya Guardiola nyuma y’iminota ibiri gusa umukino utangiye.

Uyu mukinnyi w’Umwongereza yongeye kubabaza abakunzi ba Arsenal bashakaga ko City itsindwa,atsinda igitego cya kabiri ku munota wa 18.

Man City yarushaga bikomeye Westham ndetse ihusha ibitego byabazwe bya ba rutahizamu bayo barimo Doku,Haaland na de Bruyne.

Mohammed Kudus yagabanyije umwenda ubwo yatsindiraga Westham igitego ku munota wa 42.Igice cya mbere cyarangiye ari ibitego 2-1.

Westham n’ubundi yagarutse irushwa bikomeye ndetse Man City ikomeza guhusha ibitego byabazwe.

Umukinnyi wo hagati,Rodri yaje gushimangira itsinzi ya Man City,itsinda igitego cya gatatu ku munota wa 59.

City yarokotse kwinjizwa igitego,ubwo West Ham yatsindaga icya kabiri cya Soucek,ariko VAR yemeza ko uyu yagitsindishije ukuboko.

Ku rundi ruhande,Arsenal bigoranye yatsinze Everton ibitego 2-1 bya Tomiyasu na Havertz ariko uburangare bwayo mu mikino ya nyuma butuma idatwara igikombe.

Man City yegukanye igikombe cy’uyu mwaka w’imikino ifite amanota 91, irusha abiri Arsenal ya kabiri mu gihe Liverpool yarangije ku mwanya wa 3 nyuma yo gutsinda ibitego 2-0.

Aston Villa yatsinzwe ibitego 5-0 na Crystal Palace ariko iri mu byishimo ko yaje mu makipe ane ya mbere.Yabonye itike ya UEFA Champions League.

Arsenal yakoze agahigo ko gutsinda imikino 28 bwa mbere mu mateka yayo muri Premier League.

Jurgen Klopp yatoje umukino wa nyuma muri Liverpool,ubu agiye mu kiruhuko nyuma y’imyaka 9 ayitoza.