skol
startimes

Abapolisi babiri barasiwe mu myigaragambyo yamagana ubucamanza ku rupfu rwa Breonna Taylor

Amakuru   Yanditswe na: Dusingizimana Remy 24 September 2020 Yasuwe: 904

Abapolisi babiri barashwe mu gihe abantu ibihumbi bari kwigaragambya mu mujyi wa Louisville muri Amerika nyuma y’uko abacamanza bavuze ko nta muntu uzaregwa urupfu rwa Breonna Taylor.


Breonna wari ufite imyaka 26 ari umukozi wo kwa muganga, yarashwe amasasu menshi n’abapolisi baje iwe tariki 13 z’ukwezi kwa gatatu.

Umupolisi witwa Brett Hankison yashinjwe, ariko ntiyarezwe urupfu rwa Breonna, ahubwo yashinjwe "gushyira ubuzima bw’undi mu kaga" arasa mu rugo rw’abaturanyi i Louisville.

Abandi bapolisi babiri nta cyaha barezwe.

Robert Schroeder ukuriye polisi mu mujyi wa Louisville yavuze ko uko abapolisi barasiwe mu myigaragambyo bameze bidateye ubwoba.

Yavuze ko ukekwaho kubarasa afunze.

Muri uyu mujyi wo muri leta ya Kentucky hatangajwe ibihe bidasanzwe ndetse umutwe w’ingabo za Amerika wiyambazwa iyo ari ngombwa woherejwe mu mihanda.

Nubwo ubutegetsi bw’uyu mujyi bwategetse ko abantu bagomba kuba bari mu ngo zabo bitarenze saa tatu z’ijoro, abantu ibihumbi bari bakiri mu mihanda na nyuma y’ayo masaha mu ijoro ryo ku wa gatatu.

Andy Beshea, Guverineri wa Kentucky, yinginze abigaragambya ngo basubire mungo zabo.

Yagize ati: "Tuzi ko igisubizo cy’urugomo atari urugomo kandi iri joro turi gutekereza ku bapolisi barashwe n’imiryango yabo. None rero ndasaba buri wese: Rwose nimujye mu rugo."

Ni iki umushinjacyaha yavuze?

Mu mategeko ya leta ya Kentucky, umuntu ahamwa no "gushyira ubuzima mu kaga" iyo akoze "igikorwa gikabije cyo kutita ku gaciro k’ubuzima".

Iki ni cyo kigero cyoroheje cyane cy’icyaha gikomeye, gusa gishobora guhanishwa gufungwa imyaka itanu.

Umuryango wa Breonna hamwe n’impirimbanyi bakomeje gusaba ko abapolisi batatu, bose b’abazungu, baregwa icyaha cyo kwica n’ubwicanyi butagambiriwe.

Gusa ibi byanzwe n’inteko y’abacamanza yize ibimenyetso.

Umucamanza mukuru wa Kentucky ejo ku wa gatatu yavuze ko "uru ari urubanza rurimo amarangamutima".

Yavuze ko raporo y’ubushakashatsi ku irasawa ryabaye yerekana ko amasasu atandatu yageze kuri Breonna rimwe ariyo ryari ribi cyane.

Avuga ko amasasu yarashwe n’abapolisi mu rwego rwo kwirengera. Iyo mpamvu igatuma "badashobora gukurikirana umuntu ho icyaha".

Brett Hankison uri kuregwa "igikorwa gikabije cyo kutita ku gaciro k’ubuzima" ngo ntibyakwemezwa neza ko isasu yarashe ryari iryo kwica cyangwa gukomeretsa.

Uyu mucamanza mukuru avuga ariko ko yifatanyije n’ababuze uwabo nubwo ngo ntacyo "yabaha cyo guhoza umubabaro bafite".

Yongeraho ko "ubucamanza bw’ikivunge n’urugomo bya rubanda atari ubutabera ahubwo ari ukwihorera". Gusa avuga ko FBI ikomeje iperereza.

Ni iki cyakurikiye ibi?

Ben Crump, umunyamategeko w’umuryango wa Breonna, yavuze ko ibyategetswe n’abacamanza "biteye umujinya kandi ari ukwibasira" umuryango.

Abategetsi muri uku kwezi bameye indishyi y’akababaro ya miliyoni $12 ku muryango wa Breonna.

Abajijwe icyo avuga ku mwanzuro z’abacamanza, Perezida Donald Trump yabwiye ikiganiro n’abanyamakuru muri iri joro ati: "Ndibaza ko ari ibintu byiza".

Ndetse yashyigikiye cyane umwanzuro wa guverineri wa Kentucky wo kohereza uriya mutwe w’ingabo ku mihanda.

Guverineri Andy Beshear, wo mu ishyaka ry’abademokarate, yasabye abashinjacyaha kugaragaza ibimenyetso byashingiweho n’inteko y’abacamanza.

Breonna byamugendekeye bite?

Nyuma gato ya saa sita z’ijoro ku wa gatanu tariki 13 z’ukwezi kwa gatatu, yari aryamanye n’umuhungu w’inshuti ye, Kenneth Walker, ubwo bumvaga ikintu kihonda ku rugi.

Abapolisi barimo bakora isaka ry’ibiyobyabwenge, bakoresheje ikintu kiremereye kugira ngo binjire mu nzu.

Umucamanza yari yatanze uburenganzira bwo gusaka urugo rwa Breonna kuko abakora iperereza bacyetse ko uwahamwe no gucuruza ibiyobyabwenge - Jamarcus Glover wahoze ari umukunzi we - akoresha aha hantu mu kubyakira.

Breonna we nta cyaha kindi yari asanzwe azwiho.

Umukunzi we Kenneth Walker, utunze imbunda byemewe n’amategeko, nyuma yaje kubwira polisi ko yaketse ko umuntu ubateye mu nzu iryo joro ari Jamarcus Glover nk’uko bivugwa n’ikinyamakuru New York Times.

Abategetsi bavuga ko isasu rya Bwana Walker ryakomerekeje umupolisi mu kaguru bikamuviramo kubagwa.

Abapolisi batatu bandi basubije amasasu ya Walker, barekura agera kuri 32 nk’uko raporo ya FBI ku irasana ryabayeho ibivuga.

Breonna, wari wavuye mu buriri kubera urwo rusaku, yafashwe n’amasasu apfira aho mu nzu.

Raporo y’abapolisi ivuga ko bari bahawe uburenganzira bwo "kwinjira badakomanze".

Gusa ejo ku wa gatatu, umucamanza mukuru wa Kentucky yavuze ko abo bapolisi bavuze ko ubwo bari bagiye kwinjira babanje kwivuga, ndetse ngo "hari umutangabuhamya ubyemeza".

Bamwe mu baturanyi ariko babwiye ibitangazamakuru byaho ko batigeze bumva abo bapolisi bivuga.

Nyuma nta biyobyabwenge byabonetse aho hantu, nubwo umushinjacyaha we mbere yari yavuze ko gusaka byahise bihagarikwa kubera uko kurasana.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Perezida Macron yasabye ubufasha Uburusiya mu kurwanya iterabwoba nyuma...

Perezida Emmanuel Macron yasabye Uburusiya kongera ubufatanye mu kurwanya...
21 October 2020 Yasuwe: 899 0

Umwarimu w’amateka yaciwe umutwe azira kwerekana igishushanyo cya...

Umwarimu w’amateka wo mu gihugu cy’Ubufaransa yaciwe umutwe azira kwerekana...
17 October 2020 Yasuwe: 1918 0

Umugore yatabawe amaze umwaka n’igice afungiwe mu bwiherero n’umugabo...

Umugore w’imyaka 35 wo mu gihugu cy’Ubuhindi yatabawe na polisi yo mu gace...
15 October 2020 Yasuwe: 8015 1

Abahanga mu by’ibirunga baraburira ko Nyiragongo yaba igiye kongera...

Abahanga mu by’ibirunga baraburira ko ikiyaga cy’umuriro w’amazuku kiri kuzura...
14 October 2020 Yasuwe: 2131 0

Ibyo wamenya kuri missile nini cyane Koreya ya ruguru yerekanye mu karasisi...

Koreya ya ruguru yerekanye missile ya rutura yambukiranya imigabane...
12 October 2020 Yasuwe: 3041 0

USA: FBI yahungishije Guverineri wari hafi gushimutwa n’abagizi ba...

Guverineri w’intara ya Michigan muri Leta Zunze Ubumwe za Amerika yahawe...
10 October 2020 Yasuwe: 2222 0