addresiya
startimes

Umuherwe Kabuga Felicien ushinjwa kuba umuterankunga mukuru wa Jenoside yakorewe Abatutsi yafashwe

Amakuru   Yanditswe na: Dusingizimana Remy 16 May 2020 Yasuwe: 6305

Umuherwe Kabuga Félicien wari umaze imyaka myinshi ashakishwa n’ubutabera kubera ibyaha ashinjwa byo kugira uruhare rukomeye muri Jenoside yakorewe Abatutsi yafatiwe mu Bufaransa.



Nkuko amakuru dukesha ikinyamakuru BBC abitangaza,uyu mugabo wari umaze igihe kinini ashakishwa yafatiwe hafi y’umujyi wa Paris muri iki gitondo tariki ya 16 Gicurasi 2020, nkuko minisitiri w’Ubutabera w’Ubufaransa yabitangaje.

Ibiro ntaramakuru Reuters bitangaza ko Kabuga w’imyaka 85 y’amavuko yabagaho akoresha umwirondoro mpimbano mu icumbi ryo mu gace ka Asnières-sur-Seine, hafi y’i Paris, nkuko bikubiye mu itangazo rya minisiteri y’ubutabera mu Bufaransa.

Hari hashize imyaka 25 ashakishwa n’ubutabera mpuzamahanga.

Mu mwaka wa 1997 ni bwo urukiko rwa Arusha rwashyizeho impapuro zo kumuta muri yombi, akurikiranyweho ibyaha birindwi bya jenoside.

Ni we Munyarwanda washakishwaga cyane n’ubutabera, ndetse Leta Zunze Ubumwe z’Amerika zari zarashyizeho igihembo cya miliyoni 5’amadolari ku muntu watanga amakuru yatuma atabwa muri yombi.

Kabuga afatwa nk’umuterankunga mukuru wa Jenoside yakorewe Abatutsi muri 1994 yatwaye ubuzima bw’abarenga miliyoni.

Yari mu gatsiko gakomeye kari ku butegetsi mu Rwanda,kateguye byimbitse Jenoside yakorewe Abatutsi mu mwaka wa 1994.

Yari Perezida ndetse na nyiri radiyo RTLM (Radio Télévision libre des mille collines) n’ikinyamakuru Kangura byakanguriye byimazeyo Abahutu kwica abatutsi muri 1994.

Mu byo Kabuga ashinjwa harimo kuba yarinjije mu Rwanda imihoro myinshi ingana na Toni 580 yari igamije guhabwa Interahamwe ngo zimare Abatutsi.

Bivugwa ko muri 1993 yaguze mu Bushinwa imihoro 500,000 aho nibura umunyarwanda 1 kuri 3 bakuze yari bubone umuhoro.Yabyaye abana 2 b’abakobwa bombi bashakanye n’abahungu 2 ba Juvénal Habyarimana wahoze ari Perezida w’u Rwanda.

Bivugwa ko kuba Kabuga Félicien yari amaze igihe ahigwa ariko kumufata byarananiranye, biterwa n’uko yakoreshaga ubutunzi afite mu kwiyoberanya cyangwa ubushake buke bw’ibihugu yihishemo.

Ubwo Urukiko Mpuzamahanga Mpanabyaha rwashyiriweho u Rwanda (TPIR) rwatangiraga mu Ugushyingo 1994, mu bari ku ruhembe rw’umugambi wa Jenoside rwafunzwe mu 2015 rutabonye, barimo Umunyemari Félicien Kabuga, Major Protais Mpiranya na Augustin Bizimana wari Minisitiri w’Ingabo.

Kabuga Felicien bivugwa ko yavutse mu mwaka wa 1935 avukira muri Komini Mukarange muri Perefegitura ya Byumba ubu akaba ari I Gicumbi mu ntara y’Amajyaruguru.

Uyu muherwe ngo yiyigishije gusoma no kwandika kubera ko atagize amahirwe yo kugera mu ishuri bitewe n’umuryango ukenye yavukiyemo hanyuma aza gutangira kuboha ibiseke ku myaka 12 akabigurisha biza kumubyarira igishoro yahereyeho acuruza aba umuherwe.

Kabuga yagiye yaguka mu Bucuruzi kugeza ubwo atangira gutumiza caguwa hanze y’u Rwanda nyuma yagura ubucuruzi atumiza amatara,ibikoresho byo mu ngo n’iby’amashanyarai mu Buholandi,mu Bubiligi no muri Amerika.

Mu mwaka wa 1994,Kabuga yari afite amakamyo akururana atwara ibicuruzwa agera kuri 40,imirima y’icyayi isaga hegitari 350,uruganda rusya ingano zingana na Toni 39000 i Byumba,imiturirwa myinshi i Kigali,n’imigabane mu mabanki nka BCR,BACAR,La Rwandaise no mu kigo gitwara abagenzi cya STIR.

Kuwa 17 Nzeri 2007, byavuzwe ko Kabuga Felicien yaciye mu myanya y’intoki Polisi y’u Budage hafi y’Umujyi wa Francfurt mu Budage, kuko yari hafi neza yo kumuta muri yombi.

Umushinjacyaha wa ICTR, Hassan Bubacar Jallow nawe yigeze kwemeza ko Kabuga ari muri Kenya gusa Kenya yabihakanye kenshi.

Kenya yagiye itahurwamo abajenosideri benshi kuko muri Nyakanga 1997,hakozwe umukwabu ukomeye wiswe ‘Operation NAKI’, wafatiwemo barindwi barimo Jean Kambanda wabaye Minisitiri w’Intebe, Pauline Nyiramasuhuko wari minisitiri n’umuhungu we Arsene Shalom Ntahobari, umunyamakuru Hassan Ngeze, Col Gratien Kabiligi, Aloys Ntabakuze na Sylvain Nsabimana wabaye perefe wa Butare.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Nsabimana Callixte uzwi nka Sankara agiye kongera kuburanishwa

Nsabimana Callixte uzwi nka Sankara wigambye ibitero bitandukanye byagiye...
3 June 2020 Yasuwe: 582 0

Urukiko rwa Gisirikare rwarekuye abasirikare 3 muri ba bandi 5 bashinjwa...

Urukiko rwa gisirikare kuri uyu wa Gatanu rwafashe icyemezo ku bujurire...
30 May 2020 Yasuwe: 1627 0

Nyanza: Abantu 24 bahamijwe n’Urukiko ibyaha by’iterabwoba n’ubugambanyi

Urukiko Rukuru, Urugereko rwihariye ruburanisha ibyaha Mpuzamahanga...
29 May 2020 Yasuwe: 877 0

Nyamagabe: Polisi yataye muri yombi umusore yafashe ari kwiba...

Polisi ikorera mu Karere ka Nyamagabe muri Sitasiyo ya Polisi ya Tare,...
29 May 2020 Yasuwe: 712 0

Ladislas Ntaganzwa wagize uruhare muri Jenoside yakorewe Abatutsi yakatiwe...

Urugereko rwihariye rw’urukiko rukuru ruri mu mujyi wa Nyanza mu majyepfo...
28 May 2020 Yasuwe: 905 0

Gasabo: Polisi yafunze abantu 20 barenze ku mabwiriza yo kwirinda COVID-19...

Polisi y’u Rwanda yerekanye abantu 20 bafunzwe bazira kurenga ku mabwiriza...
24 May 2020 Yasuwe: 2087 0