skol
startimes

Umugabo yemereye urukiko ko yishe abantu 09 bahuriye kuri Twitter

Amakuru   Yanditswe na: Dusingizimana Remy 1 October 2020 Yasuwe: 4492

Umugabo wo mu Buyapani yemereye urukiko ko yishe abantu icyenda amaze guhurira na bo kuri Twitter, muri uru rubanza rwatumye igihugu kigwa mu kantu.


Takahiro Shiraishi, wahimbwe izina ry’"umwicanyi wo kuri Twitter", yatawe muri yombi mu 2017 nyuma yuko ibice by’imirambo bisanzwe mu nzu ye.

Ejo ku wa gatatu yabwiye urukiko rwo mu murwa mukuru Tokyo ko ibyo aregwa "byose ari ukuri".

Ariko abunganizi be mu mategeko bavuga ko ibyo birego bikwiye kugabanywa kuko bigaragara ko abo yishe babanje kwemera ko abica.

Mu gihe urukiko rwaba rubimuhamije, Bwana Shiraishi yahabwa igihano cy’urupfu - mu Buyapani gitangwa bamanika mu mugozi uwo bagikatiye.

Uru rubanza rurimo gukurikiranirwa hafi muri iki gihugu.

Mu iburanisha rya mbere ry’ejo ku wa gatatu, abantu barenga 600 batonze umurongo bashaka kujya mu myanya 13 yagenewe abaje kumva urubanza, nkuko bitangazwa n’igitangazamakuru NHK cya leta y’Ubuyapani.

Byagenze gute?

NHK ivuga ko ubushinjacyaha bwabwiye urukiko ko uregwa yafunguye konti kuri Twitter mu kwezi kwa gatatu mu 2017 agamije "kugera ku bagore batekereza ku kuba bakwiyahura, yabonaga ko bo byoroshye kubageraho".

Umunani mu bo aregwa kwica bari abagore, umwe muri bo yari afite imyaka 15.

Umugabo umwe gusa mu bo aregwa kwica wari ufite imyaka 20, yishwe amaze guhangara Bwana Shiraishi amubaza aho umukobwa bakundanaga yarengeye, nkuko bivugwa n’ibitangazamakuru byo mu Buyapani.

Uyu mugabo uregwa w’imyaka 29, bivugwa ko abo yishe yabashukaga ababwira ko yabafasha gupfa ndetse rimwe na rimwe akavuga ko aziyica agapfana na bo.

Umwirondoro we kuri Twitter warimo amagambo agira ati: "Ndashaka gufasha abantu bafite ububabare bukomeye. [Wanyoherereza] DM [ubutumwa bwo mu ibanga] igihe icyo ari cyo cyose".

Ubwo bwicanyi bw’uruherekane bwatahuwe ubwo polisi yarimo ishakisha umukobwa waburiwe irengero, isanga ari umwe bo uwo mugabo aregwa ko yishe.

Abapolisi basatse inzu ya Bwana Shiraishi iri mu mujyi wa Zama, hafi y’i Tokyo, bahasanga ibice by’imirabo y’abantu.

Abunganizi be bavuze iki?

Abunganira mu mategeko Bwana Shiraishi bavuze ko abo yishe bari babanje kubyemera, ko rero ibirego bikwiye kugabanywa bikaba "kwicwa wabanje kubyemera".

Ibi bihanishwa igihano cyo gufungwa cyo hasi, kiri hagati y’amezi atandatu n’imyaka irindwi.

Ariko byatangajwe ko Bwana Shiraishi atemeranya n’abanyamategeko be kuri iyo ngingo.

Yabwiye ikinyamakuru cyaho cyitwa Mainichi Shimbun, gisohoka buri munsi, ko yishe abo yishe batabanje kubyemera.

Mu magambo ye yatangajwe n’icyo kinyamakuru ku wa gatatu, yagize ati: "Hari ugukobagurika ku mutwe ahagana inyuma kw’abishwe. Bivuze ko batari babanje kubyemera kandi nabikoze gutyo kugira ngo batandwanya [banga kwicwa]".

Ubwo bwicanyi bwagize izihe ngaruka?

Abatuye Ubuyapani bahise bagwa mu kantu ubwo ibyo bwahishurwaga mu 2017, ndetse bituma hongera kubaho impaka zijyanye n’imbuga za internet zivuga k’ukwiyahura.

Icyo gihe leta y’Ubuyapani yavuze ko ishobora gushyiraho amategeko mashya agenga izo mbuga.

Byanatumye Twitter ikora impinduka mu mategeko agenga abakoresha uru rubuga, ivuga ko badakwiye "kwamamaza cyangwa gushishikariza kwiyahura cyangwa kuba umuntu ubwe yakwikorera ikintu gishyira ubuzima mu kaga".

Icyo gihe kandi umuyobozi mukuru wa Twitter Jack Dorsey yavuze ko ibyabaye bibaje "mu buryo bukomeye cyane".

Ubuyapani bumaze igihe buhangana n’ikigero cy’abaturage biyahura kiri mu biri hejuru cyane mu bihugu byateye imbere, nubwo imibare yagabanutse nyuma yuko mu myaka irenga 10 ishize hashyizweho ingamba zo kwirinda kwiyahura.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Ngororero: Polisi yagaruje ibikoresho by’umuturage byari byibwe...

Kuri uyu wa Gatanu tariki ya 15 Mutarama Polisi y’u Rwanda ikorera Karere ka...
17 January 2021 Yasuwe: 3265 0

RIB yafunze abantu 8 barimo nyir’ivuriro “Sante pour Tous”

Urwego rw’Igihugu rushinzwe ubugenzacyaha RIB rwatangaje ko rwafunze...
16 January 2021 Yasuwe: 6113 0

Nyarugenge: Abasore n’inkumi 13 bafashwe bari kunywa inzoga na Shisha bishe...

Abasore n’inkumi 13, abakobwa 6 n’abahungu 7 bafashwe saa 20h50 babyina...
16 January 2021 Yasuwe: 4813 1

Polisi yerekanye abagabo bakekwaho kwiba ibyuma by’amashanyarazi...

Polisi y’Igihugu, mu gitondo cyo kuri uyu wa Gatanu tariki 15 Mutarama 2021,...
15 January 2021 Yasuwe: 3421 0

Rubavu: Umugore n’umugabo we bafatanwe udupfunyika 2,480 tw’urumogi

Abapolisi bo mu ishami rya Polisi y’u Rwanda rishinzwe kurwanya...
15 January 2021 Yasuwe: 3596 0

Rubavu:Abiyitaga abayobozi ba sitasiyo ya Polisi bakambura abaturage batawe...

Polisi y’u Rwanda ikorera mu Karere ka Rubavu, Umurenge wa Nyamyumba kuri...
14 January 2021 Yasuwe: 3240 0