Imikino ya UEFA Champions League y’umunsi wa 05 mu matsinda kuva murya E kugera muri H yarangiye amakipe yo mu Bwongereza atagaragaje ubukaka bwayo kuko uretse Tottenham yatsinze izindi zose zatsikiye.

Sponsored Ad

Mu mukino wabimburiye iyindi kuri uyu wa 03,ikipe ya Chelsea yananiwe gutsinda Valencia yari iwayo banganya ibitego 2-2 bituma umutoza Frank Lampard atishimira ibyawuvuyemo.

Valencia niyo yafunguye amazamu ku munota wa 40 ku gitego cyatsinzwe na Carlos Soler nyuma Chelsea iza kuyigaranzura ihita iyitsinda ibitego 2 byikurikiranya birimo icya Matteo Kovacic ku munota wa 41 mu gihe Christian Pulisic yahise yongeramo ikindi ku munota wa 50.

Valencia yahise itangira gushaka uko yatsinda igitego cyo kwishyura maze ku munota wa 65 ibona penaliti yatewe nabi na Daniel Parejo.Ku munota wa 82 Valencia yishyuye ibifashijwemo na Daniel Wass bituma amakipe agabana amanota.

Nyuma y’uyu mukino umutoza Frank Lampard yavuze ko atishimiye uko abakinnyi be bitwaye kuko batabashije gutsinda ngo yizere kuzagera muri 1/16.

Mu wundi mukino wo muri iri tsinda rya H,ikipe ya Ajax yasanze Lille iwayo iyitsinda ibitego 2-0 byatsinzwe na Hakim Ziyech na Quincy Promes bituma inakomeza kuriyobora n’amanota 10 mu gihe Chelsea na Valencia ziganya amanota 8.

Liverpool yari yakiriye mu rugo ikipe ya Napoli, yahabwaga amahirwe na benshi kubera ko iyi kipe yo mu Butaliyani yari mu bihe bibi gusa ntiyitwaye neza kuko banganyije igitego 1-1.

Napoli niyo yafunguye amazamu ku munota wa 21 ku gitego cyatsinzwe na Dries Mertens hanyuma Liverpool icyishyura ku munota wa 65 gitsinzwe na Dejan Lovren.

Muri iri tsinda E ikipe ya Liverpool irayoboye n’amanota 10,ikurikiwe na Napoli n’amanota 9 mu gihe Salzburg yaraye inyagiye Genk ibitego 4-1 iri ku mwanya wa 3 n’amanota 7 ndetse irahabwa amahirwe yo gutesha Liverpool itike ya 1/16 ku mukino wa nyuma wo mu matsinda.

Mu itsinda F rifatwa nk’iry’urupfu muri iyi Champions League,FC Barcelona yakiriye Borussia Dortmund iyitsinda ibitego 3-1 byatsinzwe na ba rutahizamu bayo bakomeye.

Ku munota wa 29 Luis Suarez yafunguye amazamu hanyuma ku munota wa 33 kabuhariwe Lionel Messi wakinaga umukino we wa 700 muri FC Barcelona ashyiramo igitego cya kabiri mu gihe Antoine Griezmann winjiye mu kibuga asimbuye Dembele ku munota wa 26 yashyizemo igitego cya 3 ku munota wa 67.Borussia Dortmund yatsindiwe na Jadon Sancho.

Lionel Messi waraye utsinze igitego cya 613 muri Barcelona akanatanga imipira 2 yavuyemo ibitego,yaraye akoze agahigo ko kuba umukinnyi utsinze igitego amakipe menshi atandukanye kuko Dortmund yabaye ikipe ya 34 atsinze.Muri iyi mikino 700 Messi yatanze assists 236.

Mbere y’uyu mukino,Messi yanganyaga na Cristiano Ronaldo amakipe batsinze muri Champions League ariko kuri uyu mugoroba yahise amurusha.

Mu wundi mukino wo muri iri tsinda,Ikipe ya Inter Milan yatsinze Slavia Prague ibitego 3-1 birimo 2 bya Lautaro Martinez na Romelu Lukaku.Lukaku yatsinze ibitego 2 byanzwe na VAR.

Barcelona yahise ikatisha itike yo kwerekeza muri 1/16 kuko iyoboye iri tsinda n’amanota 11 mu gihe Dortmund na Inter Milan banganya amanota 7 ndetse bategereje umukino wa nyuma ngo bisobanure.

Mu itsinda G,ikipe ya Zenit yatsinze Lyon ibitego 2-0 mu gihe Leipzig yanganyije na Benfica 2-2.Leipzig niyo iriyoboye n’amanota 10 mu gihe Zenit ifite 7 inganya na Lyon mu gihe Benfica ifite 4.